top of page

Aplikashon pa sitio
dia di Rincon 2024

Tuma bon nota di e reglanan aki promé ku inskribí pa haña un sitio pa traha bo stènt.

 

Artíkulo 1. Lesa reglanan bon.

Tur esnan ku ta deseá un sitio pa traha stènt mester lesa /skucha i komprondé e reglanan riba wèpsite www.diadirincon.org

 

Artíkulo 2. Hasi eskoho.

Klek riba e nòmber “skohe sitio”. Bo ta mira e mapa kaminda por hasi eskoho pa traha bo stènt. Skohe konsiente den kua área bo ta deseá na traha bo stènt. Klek riba e sitio di eskoho i yena e formulario ku ta aparesé. Hasi un eskoho konsiente teniendo kuenta ku tur e eksigensianan ku tin mará na e sitio.

Artikulo 2b Sitio privá.
Tur sitio privá ta indiká ku kolor bèrdè riba e mapa. Despues ku tuma kontakto ku doño di e sitio privá ta manda un komprobante di e akuerdo aki via nos email. Komishon lo registrá esaki i notifiká e montante di kontribushon.

 

Artíkulo 3. Aprobashon.

Despues di yena e formulario e petishon ta bai outomatikamente serka komishon. Bo ta risibí outomátikamente un meil via di wèpsite kaminda ta konfirmá bo eskoho. Komishon na su turno ta kontrolá esaki I ta duna un kontesta dentro di 5 dia di trabou.

 

Artíkulo 4a Pago.

Bo ta risibí un meil di komishon kaminda lo rekonfirmá  bo sitio I tambe e proseso.

Komishon Herensia Kultural ta duna aprobashon pa por hasi e pago nesesario. Tin espasio pa hasi e pago dentro di un tèrmino di 2 dia. Despues di hasi e pago e sitio lo ta kompletamente blokiá pa bo persona i dia 6 aprel por kuminsá traha e stènt na e sitio. Si akaso no kumpli ku e pago dentro di 2 dia, e sitio ta keda desblokia I  ta liber pa otro persona por aplika pa e sitio.

 

Artíkulo 4b Kanselashon.

Si akaso por surgi kualke sirkunstansia ku por impedí pa hasi uso di e sitio, lo no risibí sèn bek. Por tuma kontakto ku komishon.

 

Artíkulo 5. REUNION OBLIGATORIO:

Tur doño di stènt tin ku partisipá obligatorio na un reunión informativo.

Dia 2 di aprel tin un anochi informativo pa tur doño di stènt ku a inskribí. Mirando e kapasidat di espasio nos ke invitá solamente un persona o un representante pa stènt na e anochi aki.

E reunion aki lo bai tin informashon di parti diferente instansia, por ehèmpel Polis, Selibon, GGD, Komishon Herensia Kultural, ets.

 

Artíkulo 6. FORMA DI E STÈNT.

Nos ta supliká bo pa kombertí e sitio di bo stènt den un forma kultural. Esta estilo krioyo imitando nos ambiente di ántes kaminda ku bo ta usa bo fantasia pa bo espasio bira algu úniko. Usa materialnan manera pal'i maishi, bara di flambeu i rama di koko. Herensia Kultural no ta aseptá ni tapol, ni tènt di plèstik. Tur stènt ta haña un number I esaki mester ta visibel. Bo por traha/harma bo stènt entre 6 di aprel i 21 di aprel 2024. Un miembro di komishon mester duna outorisashon pa kuminsa traha e stènt. Esaki pa evitá ku ta traha stènt ku no ta kuadra ku midi I regla. Komishon ta kontrolá dia 22 di aprel i ta risibí pèrmit por eskrito I tambe un number.  Pa stent ku no ta kompletamente harma prome ku 22 di aprel lo no por hasi uso di e sitio enkuestion.

 

Artíkulo 8. Koriente I iluminashon.

Tur doño di stent ku tin mester di koriente na nan stènt mester tin nan stènt harmá mas tarda 21 di aprel 2024. Por usa koriente for di dia, 26 di aprel te ku dia 1 di mei 2024. E koriente ku suministrá na kada stènt ta primeramente pa iluminashon i un parti chikitu pa aparato nan elektróniko ku ta usa kapasidat  abou di koriente. E stènt ta pegá riba un ret ku ta repartí te ku un máksimo di 25 ampèr pa e rit. Dado kaso bo stènt tin nesesidat di mas ampèr kada doño di stent mes tin ku regla esei, den forma di un Generator. Komishon Herensia Kultural no ta responsabel pa ningun daño kousá na aparato elektróniko.

 

Artíkulo 9.  Outoridat.

Si pa un òf otro motibu outoridatnan mester para funshonamentu di un stent, Komishon Herensia Kultural no ta responsabel pa esei.

 

Artíkulo 10.

Herensia Kultural no ta responsabel pa daño nan kousá dor di forsa mayor.

 

Artíkulo 11. KONTROL

Tur doño di stènt mester por kumpli ku tur reglanan di outoridat manera, brandweer, Polis, Direktorado di Planifikashon i Desaroyo i Direktorado di Supervishon i Mantenshon di Lei. 

 

Artíkulo 12. Pèrmit pa operá un stènt.

Pa por manehá un stènt tur doño di stent mester tin un pèrmit di Komishon Herensia Kultural. Si no kumpli ku e reglanan stipulá pa Komishon Herensia Kultural bo ta pèrde e permit pa por operá un stènt. 

 

Artíkulo 13. Responsabilidat.

Tur responsabilidat ta keda na e doño di stènt i te ku dos(2) meter rondó di su stènt. Herensia Kultural no ta responsabel pa niun pèrdida, daño di artíkulonan di e operadó di e stent. Herensia Kultural no ta responsabel pa niun insidente  o aksidente ku tuma lugá na i/ o dos(2) meter rondó di e stent. No ta pèrmiti ningun klase di bulgaridat riba stènt skirbi o poné. Den kaso ku bini ku un pòti pòti mester notifiká komishon pa asina stipulá un sitio pa pone esaki.

  

Artíkulo 14. Fechanan importante.

 

  • Dia  2 di aprel 2024 tin reunion obligatorio pa tur doño stènt.

 

  • Último fecha pa inskribí ta dia 19 di aprel 2024.

 

  • Bo mester por traha/harma bo stènt entre 6 di aprel i 21 di aprel 2024.

 

  • Último fecha pa hasi pago di stènt ta 21 di aprel 2024.

 

  • Dia 7 di mei 2024 lo kuminsá kontrolá si a plama i piki tur kos manera debe ser. Si no kumpli ku esaki e doño lo risibí but i subi Blacklist.

 

Artíkulo 16. Tene bon na kuenta!

Si bo no por kumpli ku tur e reglanan ariba menshoná ta rekomendabel pa no hasi petishon pa un stènt riba e dia di Rincon 2024. Ku bo koperashon nos ta hasi e dia di Rincon 2024 mas eksitoso.  

TA NOS TUR HUNTU TA HASI DIA DI RINCON.

 

Danki.

Direktiva di Komishon Herensia Kultural.

bottom of page